מן המיצר ♫

מִן-הַמֵּצַר קָרָאתִי יָּהּ עָנָנִי בַמֶּרְחָב יָהּ.
אֲדֹנָי לִי לֹא אִירָא מַה-יַּעֲשֶׂה לִי אָדָם.
אֲדֹנָי לִי בְּעֹזְרָי וַאֲנִי אֶרְאֶה בְשֹׂנְאָי.
טוֹב לַחֲסוֹת בַּאֲדֹנָי מִבְּטֹחַ בָּאָדָם.
טוֹב לַחֲסוֹת בַּאֲדֹנָי מִבְּטֹחַ בִּנְדִיבִים.
כָּל-גּוֹיִם סְבָבוּנִי בְּשֵׁם אֲדֹנָי כִּי אֲמִילַם.
סַבּוּנִי גַם-סְבָבוּנִי בְּשֵׁם אֲדֹנָי כִּי אֲמִילַם.
סַבּוּנִי כִדְבוֹרִים דֹּעֲכוּ כְּאֵשׁ קוֹצִים בְּשֵׁם אֲדֹנָי כִּי אֲמִילַם.
דַּחֹה דְחִיתַנִי לִנְפֹּל וַאֲדֹנָי עֲזָרָנִי.
עָזִּי וְזִמְרָת יָהּ וַיְהִי-לִי לִישׁוּעָה.
קוֹל רִנָּה וִישׁוּעָה בְּאָהֳלֵי צַדִּיקִים יְמִין אֲדֹנָי עֹשָׂה חָיִל.
יְמִין אֲדֹנָי רוֹמֵמָה יְמִין אֲדֹנָי עֹשָׂה חָיִל.
לֹא-אָמוּת כִּי-אֶחְיֶה וַאֲסַפֵּר מַעֲשֵׂי יָהּ.
יַסֹּר יִסְּרַנִּי יָּהּ וְלַמָּוֶת לֹא נְתָנָנִי.
פִּתְחוּ-לִי שַׁעֲרֵי-צֶדֶק אָבֹא-בָם אוֹדֶה יָהּ.
זֶה-הַשַּׁעַר לַאדֹנָי צַדִּיקִים יָבֹאוּ בוֹ.
אוֹדְךָ כִּי עֲנִיתָנִי וַתְּהִי-לִי לִישׁוּעָה.
אֶבֶן מָאֲסוּ הַבּוֹנִים הָיְתָה לְרֹאשׁ פִּנָּה.
מֵאֵת אֲדֹנָי הָיְתָה זֹּאת הִיא נִפְלָאת בְּעֵינֵינוּ.
זֶה-הַיּוֹם עָשָׂה אֲדֹנָי נָגִילָה וְנִשְׂמְחָה בוֹ.